生日飯

慶祝生日去左Chester County果邊﹐有間叫Nectar既餐廳。之前睇過menu﹐覺得幾得意﹐似乎有D fusion元素﹐同埋口碑都幾好﹐所以都想試下。

去到泊車﹐原來valet係免費﹐已經值得讚下。

入面裝修都幾grand下(唔記得影低入面D陳設添)﹐幾有酒店餐廳feel﹐感覺唔錯。坐低之後就發現有D檯係可以extend既(有D似酒樓果D可以加大既檯)﹐咁卡位果邊就可以將D檯連埋一齊﹐就可以比一大group人坐埋﹐諗得都幾週到。

原本想叫D亞洲色彩比較重既野﹐因為呢個都係餐廳既特色﹐不過後尾竟然都叫哂D好西化既野。

一人要左個沙律﹐一個係番茄加mozzarella﹐另一個就係baby green salad。


料係就係新鮮﹐不過可惜番茄唔夠熟﹐所以酸﹐唔係幾合格。另一個就無咩特別﹐係擺係頂果舊炸goat cheese有D驚喜。食到呢度覺得有D失策﹐後悔叫左沙律﹐應該叫D有特色D既前菜(有個foie gras sushi其實都令我有D好奇﹐不過又覺得太冒險)。

主菜﹐一個係龍蝦肉+煎帶子﹐再以龍蝦湯做汁﹐另一個就係茄B飛佛既燒羊架。

龍蝦只係烚﹐但係好鮮味﹐好爽口﹐帶子更加值得一讚﹐外層微焦﹐少少脆口﹐裡面卻係軟滑彈牙﹐帶子既肉汁又保持到﹐火候簡直係完美。底下既龍蝦湯都襯托到兩個主角既鮮味﹐真係好有創意既成功配搭。配菜有條翠玉瓜卷﹐裡面包住蝦膠﹐真係幾中西合璧﹐好得意。墊底既配菜係leek fondue﹐食落去其實係將大蔥用cream微微炒過﹐但係加埋龍蝦湯真係幾夾﹐最後蔥頭都用佢地浸哂D龍蝦湯點哂黎食。

至於羊架﹐呢個真係好過上次去bridget's果D﹐記得上次果碟羊架蔥頭都有彈下﹐但係今次呢個就真係無得彈﹐無論配既汁﹑裡面既肉質﹑外面既焦香﹐都無可挑剔﹐最重要係有炭燒既味道﹐而且肉都好明顯有醃過﹐抵讚。而個汁都有少少醬油同埋酒既痕跡﹐同上次bridget's果個filet mignon有異曲同工之妙。另外﹐配菜既配搭都幾特別﹐傳統扒房/餐廳serve羊架都好鍾意配薯蓉/薯餅之類﹐就會變得好heavy﹐以往有一次食過係配mango salsa﹐蔥頭就好欣賞。今次呢個羊架就配corn & avocado salad﹐幾refreshing。

對於呢間既甜品都幾有興趣﹐所以就問下waiter每份有幾大﹐佢就話每份其實都係一人份量﹐唔會好多﹐所以就點左個green tea mousse tower(其實即係綠茶mousse cake)。驚喜既係﹐因為係我生日﹐waiter話送多個佢地餐廳最受歡迎既甜品--炸donut--比我地試下﹐真係好識做。

碟donut上面用朱古力寫左happy birthday﹐仲加左支蠟燭﹐雖然係小野﹐都抵讚。

綠茶mousse cake 唔差﹐不過達唔到預期水準﹐mousse夠滑﹐可惜奶味太重﹐凸顯唔到綠茶香味﹐可能都係要顧及鬼佬口味啦。而且底下既cake加左D raspberry jam﹐唔係幾夾﹐係一大敗筆。如果係我設計﹐我會用紅豆代替jam喇。

反而個donut就有驚喜。我地就諗住係送既就無咩期望﹐點知又真係幾好食。donut明顯係新鮮炸起﹐沾左cinnamon sugar﹐旁邊有三種dipping sauce﹐有黑朱古力﹑焦糖同埋raspberry﹐三種都好好味﹐而且仲可以兩種甚至三種一齊dip﹐試唔同既combination﹐幾好玩。茄B向來唔太好焦糖﹐不過經過我推介都試左﹐我地一致裁定焦糖既combination同呢個donut係最夾既。結果係驚喜之下﹐碟野完全清哂。呢碟野好食又好玩﹐share又方便﹐難怪會係最受歡迎既甜品。

特別一提﹐去洗手間果陣﹐無意中聽到佢地manager定係老闆係度講廣東話﹐估計呢間野應該係香港/廣東人開。

呢間野仲有中文名﹐叫丹露軒。