最近圓明園生肖頭像拍賣事件﹐引起不少關於民族尊嚴的爭論。以下是陶傑提供另一個火燒圓明園歷史事件的另一版本
早晨陶傑
火燒圓明園上集
03.03.2009
由於圓明園獸頭拍賣事件，就令人對呢個火燒圓明園嘅歷史產生興趣，點解火燒圓明園呢？你宜家睇嗰啲歷史課本，中文嗰隻，就講下半部分，唔講個原因。
事緣1858年，英國就要求清朝嘅中國修改《南京條約》，想多開多幾個口岸通商，期間英國個態度就唔可以講話橫蠻，但就令到清庭覺得你得寸進尺。咸豐皇帝無哂主意，於是期間就出現一個法國嘅傳教士，被呢個清政府捉咗去殺頭，於是法國亦都加埋嚟一份。搞到導火線就係發生一單叫做「亞羅號」事件，一艘叫做亞羅號，其實即係射箭嗰個Arrow，就被清政府扣留，咁英、法兩國視之為中國政府係採取呢個敵意同對抗，於是就係香港調幾隻戰艦北上去到渤海灣，去到渤海灣就開始隔海就向天津塘沽口嗰度放炮「噼呤嘭嘞」。咸豐皇一聽到呢個炮聲，就嚇到面青唇白，即刻就避走熱河掟番個北京，就叫佢個細佬恭親王處理。
恭親王又名「鬼子六」，當時係中國歷史上係第一個，惟一一個係對外國嘅事務有少少興趣嘅人。恭親王都唔敢理，就放低由一班英派嘅大臣以僧格林沁為首，個個就主戰，於是火燒圓明園就咁搞起，咁欲知下集，就請留意聽埋聽日講埋事態嘅發展。
火燒圓明園(下)
04.03.2009
火燒圓明園歷史足版全溫，琴日就講到英、法就喺香港調隻戰艦去到渤海灣，喺九龍調大炮去炮轟塘沽，咸豐皇帝就避走熱河。
當時，英國政府駐中國最高級嘅外交官係一個叫做額爾金(Lord James Elgin)嘅高級專員，呢位專員就僱有一個翻譯叫做巴夏禮，英文叫做Harry Parkes。巴夏禮就率領英國、法國一個外交使節代表團共39人就走入北京，就同中國政府談判。
但係，因為嗰時咸豐已經走咗去熱河，無人理，僧格林沁下面有班高唔高、低唔低嘅政務官，為咗要向皇帝表演，以示自己愛國，就竟然將39 個英、法使節全部拉哂。一捉哂就慘喇，個個喺天津嗰度關住係一個木籠度，用一啲浸過水嘅皮帶勒到裹蒸粽咁。啱啱嗰時天時暑熱，勒得幾日唔放，嘩，慘喇！咁呢班39個英、法嘅使節個身度生咗啲屍蟲出嚟，但係個人仲「生歐歐」，仲有眼耳口鼻啲蟲爬哂出嚟。跟住熱河嗰個咸豐皇帝無主意，於是下面啲大臣就決定將佢哋由天津押解去北京，沿路就奔波流離，搞到39人生又唔得，死又唔得，去到北京就關喺圓明園嘅天牢裏面。結果《泰晤士報》隨行記者最先頂唔住就死咗，另外嗰班人亦都喺咁嚴苛嘅環境之下就死咁一大半，期間亦都有清朝嘅官員對佢哋嚴刑拷打。
最後，雖然放番哂出嚟，39人就剩番19個，死咗20個咁多。消息就傳返去英國同埋法國，英國同埋法國人民感情自然就大受傷害，見到自己嘅外交使節死得咁慘，於是喺民意同埋議會一致支持之下，英、法兩國政府就決定要燒一座宮殿報復。當時燒邊一座有異議，法國人就認為不如燒哂成個紫禁城，英國有啲理性——唔得，由於事件罪惡發生係圓明園，就放火燒圓明園吧。
火燒園明院3之歷史小插曲
05.03.2009
1860年，英、法聯軍火燒圓明園嘅事件，係今日中國歷史嘅教科書就係講火燒圓明園嘅結果，聽鄭少秋嗰首流行曲，都係將個原因按下不表。點解火燒圓明園呢？琴日兩日都講過喇，咁今日講一個插曲，就係英國決定火燒圓明園，法國就想燒紫禁城，結果拗嚟拗去英國佔上風。
係火燒之前，呢個額爾金，呢個駐中國嘅英國最高專員就係北京城牆就貼上告示，講明邊一日幾時燒，同埋勸喻北京嘅市民唔好行埋去。結果，當時嘅北京人係度睇，睇完個告示個個唔係冷漠就「笑騎騎」，點解？第一，裏面個告示唔知搵啲乜嘢師爺寫嗰啲三流嘅：「如要停車，乃可在此」嘅中文，嗰啲北京人笑英國人中文不通；第二，個個都覺得嗰時太平天國作亂，遲早都打入嚟北京，一入北京，你英國唔燒改朝換代，喂，以前呢個劉邦、項羽推翻秦始皇都係一把火燒咗阿房宮，咁你唔燒，到時太平軍都會燒，所以覺得無所謂。
結果圓明園就如期咁一把火燒咗，第一次就唔係燒哂，跟住幾十年來嗰啲太監、當地啲盜墓賊就不斷走入去偷嘢，今日咪變咗宜家一片破敗嘅風景。
