批評賤格富人=仇富﹖市民討論=集體公審﹖

前幾日香港有單「巴士陰公男」事件﹐大概係某人係巴士站非法泊車﹐令等候巴士既乘客不能上車﹐引起雙方爭執。但係即使條友理虧在先﹐反而兩母子係度不斷挑釁候車乘客﹐爆哂粗﹐仲串人話「你要搭巴士呀﹐真陰公」。乞人憎既態度真係人人喊打。


關於呢次事件﹐明報就有以下既報道﹕
明報﹕網民「集體公審」 「仇富」言論橫飛

有趣既係﹐今次事件誰是誰非好明顯﹐網民對陰公男既指責亦無歪曲事實之嫌﹐佢係巴士站泊車阻街﹐連累候車乘客搭唔到巴士﹐態度惡劣﹐呢D都係根據事實既批評﹐並唔係針對佢有車(係香港可以話係有米既象徵)呢一點。仇富一說從何而來﹖明報亂扣帽子﹐仲有咩公信力可言﹖

以下呢幅漫畫就真係貼切。


香港而家其實都有一個有趣既現象﹐就係某D人受到群眾口誅筆伐既時候﹐總會有D扮理性既人出黎護駕﹐為批評者扣上「公審」﹑「欺凌」﹑「網絡暴力」之類既帽子﹐例如包姪女﹑同埋今次既陰公男﹐仲有前排被指攀附權貴﹑埋沒良心既某位名牧。不過﹐當長毛﹑毓民﹑社運人士之流受到同等對待﹐被傳媒抹黑﹐又有誰為其喊冤﹖

或者﹐對於呢D所謂理性既人黎講﹐富人同埋權貴先至係配受保護既一方。