回歸美國

從京港澳之行回美已將近一周﹐還未完全適應時差﹐一到下午就不時釣魚﹐幸好剛回來就有一大堆工作要catch up(離去兩星期有多﹐先前手頭上的竟然無人埋尾)﹐否則肯定日光日白就去拜訪周公了。忙碌自有忙碌的好﹐不過也令我懷念離開期間每日的休閑。

幾次回港都令我感嘆美國的落後﹐不論是機場出入境的效率﹐或是交通設施﹐還有其他的配套﹐美國都遠遠比不上。香港居民持智能卡就可以使用E道出入境﹐插卡掃指紋就可以通過﹐極其快捷﹐美國卻還停留在人手檢查慢慢排隊的方式﹐實在落伍之極。另外﹐在香港﹐一張八達通就可以坐任何公共交通工具(除了的士)﹐上車或者入閘嘟一下就搞掂﹐甚至出街吃喝﹐去大膠鑊/M記/7仔/美心/奇華etc都可以用﹐真係一張發達窿傍身﹐全港通行﹔廢城呢﹐坐火車仍然有車長查票打窿﹐坐巴士就仍然入銀仔﹐發達窿的方便根本就是天馬行空﹑遙不可及。

香港人稱美食天堂﹐質素固然參差﹐但勝在多元化﹐想食任何類型的都可以找到。今次回港前也有計劃去某些地方大快朵頤﹐不過最終當然就沒有足夠時間一一去試。不過都有去九龍城食泰菜﹐但最可惜就是﹐路經九龍城﹐竟然沒有去清真牛肉館買兩個牛肉餅過下口癮﹐失策。

今次北京五天遊相當充實﹐遊故宮﹑頤和園﹑天壇﹑上長城做好漢等等當然是指定動作。夜拍天安門﹑水立方﹑鳥巢也是不錯的收穫﹐如果你喜歡影靚相的話。最難忘的可算是故宮之行﹐走路走了整個下午﹐自南門貫穿北門遊完故宮﹐再上景山(即是崇禎自縊之處--煤山)高處俯覽故宮全景﹐那種大地在我腳下的成就感實在難以形容﹐伴上夕陽西斜的美景﹐於我看來就算長城上的景色也比不上。今次影了頗多相﹐遲下整理好之後再慢慢post。

上次回港已經計劃過去澳門走走﹐不過最終沒有成行。今次終於如願﹐首次過大海踏足這個東方賭城。去過Las Vegas﹐自然就覺得澳門賭場不外如是﹐反而是那些保留特色的小街小巷和舊式建築物最為難忘﹐當然還有澳門的地道美食也令人垂涎三尺。

下次應該都會挨近假期才回去了﹐可以停留比較長時間﹐就會有多一點時間四處玩玩﹐不像這次檔期排得太緊密﹐走得匆忙。

尋找Beef Wellington的故事

Beef Wellington其實就係將filet mignon﹐加上鴨/鵝肝﹑蘑菇﹑紅酒醬汁﹐釀入酥皮內烤焗。起源就說法不一﹐有人話呢個菜式其實係法國既一個類同菜式既變奏﹐即係由filet de boeuf en croute (beef filet in a crust)演變而來﹔另外都有人話係以英國既威靈頓公爵命名(即係滑鐵盧擊敗拿破崙果位仁兄)﹐因為呢樣菜式係佢既至愛。

以前玩過一個經營餐廳既電腦遊戲﹐裡面可以比你開發不同菜式﹐而菜式就分不同星級﹐當中Beef Wellington就係五星級。只要餐廳既大廚開發出烹調Beef Wellington既能力﹐餐廳就自然客似雲來﹐而就係係呢個時候開始﹐Beef Wellington就成為我心目中既美食之一喇。

Beef Wellington係英國菜式﹐係美國自然就唔係太流行﹐就算有都只會係D老到掉牙既餐廳先有D機會見到﹐就算係高價扒房都唔會有﹐所以多年來都無預期會係美國食到。直到幾個月前係網上hea﹐睇下D飲食網頁﹐無意中發現原來Malvern有間General Warren Inn係有Beef Wellington﹐就想搵個機會試下。

上星期六去左retreat﹐原本心大心細﹐都有D想聽埋陳牧師個talk﹐但係茄B生日自己又去左香港陪唔到佢﹐都好應該補下飛既﹐雖然事先送左禮物﹐但係再帶佢去dinner會好D既﹐所以就決定早D走同佢去食個預祝生日晚餐。回程時經過Malvern﹐就貢左去General Warren Inn喇。

間野歷史悠久﹐連D客人既年紀都成正比﹐通常都係D中年以上既人黎幫襯﹐係除左隔離檯果對慶祝週年紀念既夫婦。不過就真係幾有情調﹐難怪D人鍾意黎呢度慶祝。

我就當然點左我最想試既Beef Wellington啦﹐茄B就點左鴕鳥肉﹐之前就要個salad。

Salad幾fresh﹐但係無太大特別就唔多提。重點就係兩個主菜﹐尤其是Beef Wellington真係無令我失望﹐medium既牛柳再加上鴨肝既香濃﹐再滲出一陣酒香同黑椒味﹐配合外面鬆脆既酥皮﹐真係一絕。不過真係好heavy﹐食到四份三已經覺得漏﹐好在伴碟既Brussel sprouts都解到少少膩既感覺﹐都總算可以finish到成碟。

呢碟野heavy成咁﹐成日食既話膽固醇同血壓肯定超哂標﹐威靈頓公爵如果真係好似傳說話好鍾意呢樣菜式既話﹐佢一定係好節制﹐否則點會咁長命。

一向都聽過鴕鳥肉係出名瘦同埋健康﹐茄B碟鴕鳥肉果然真係好瘦﹐waitress之前都話唔好整得太熟﹐否則就會硬﹐所以都係要左medium。試左少少﹐煎得幾香﹐而medium既熟度真係岩岩好﹐配以酸酸甜甜既野莓汁﹐都幾開胃。


甜品menu其中一樣係banana foster﹐特別之處係個廚師會親自出黎係檯邊即場炮製﹐現場可以睇到D火hum hum聲應該都幾過癮。不過最後就點左個gluten free vanilla cheese cake同茄B分﹐gluten free岩哂佢食。個餅底好特別﹐無麵粉完全係果仁加朱古力粒﹐幾香。個cheese cake就唔係太特別﹐都幾好啦。


總括黎講呢餐都算幾好啦﹐價錢偏高﹐不過總算得償所望﹐試到多年黎都無緣一見既Beef Wellington﹐而且主角又食得滿意﹐比錢都比得樂意既

暫時放鬆

苦讀一個多月之後﹐終於係上週五正式迎戰GMAT。

可能最近天氣忽冷忽熱﹐上星期開始就竟然係呢個「危急存亡之秋」染上感冒﹐真係心都慌埋。不過都唔完全係一件壞事﹐起碼成個星期都乖乖地一早就上床訓﹐整個星期都算睡眠充足。到星期五都總算可以及時恢復八九成狀態應考﹐起碼唔洗包住雲吞去試場﹐感恩。

更加感恩既係兩條essay問題都唔算太難﹐一條講房屋市場﹐一條就講醫療制度(呢條真係食正我最關注既野)﹐起碼望完問題就即刻可以有唔少idea飆出黎﹐仲搞到唔係太夠時間整返靚個結尾﹐不過完成到我心目中想寫既都算係唔錯。

去到math同verbal﹐開始期望唔係太高﹐預期只要逼近700分已經滿足。平時做practice雖然唔可以話係渣流灘或者hea做﹐但總係少左幾分謹慎﹔到正式考就真係特別小心﹐而且真係將時間用到盡﹐每條問題都榨返D時間先繼續﹐因為個電腦係唔比返轉頭改答案既。

到做完之後先知原來可以即刻知道math同verbal既分數﹐睇到真係即刻以手加額﹐講句thank God﹐因為實在比預期中高一截。離開test room﹐出面個職員姨姨print左份unofficial score report比我﹐佢都應該睇到個score﹐係度話good job﹐同埋報學校good luck咁。

其實之前都有D驚表現會失準﹐好感恩能夠及時康復﹐同埋都能夠保持謹慎﹐而家有個score渣係手﹐報學校都有多返些少信心。

暫時可以輕鬆一下(即刻開左信長黎玩喇﹗)﹐之後返黎又要部署報學校﹐都有排忙喇。