執法者欺壓小市民

呢排真係睇到好多香港執法者選擇性執法既報道﹐警察被政府高官當槍使逼害反對派都已經見得多﹐前排又有警察係網上話要開鎗打死包姪女被捕﹐但係最後又無被起訴﹐引起群眾不滿。
留言開槍打死 Amina　兩警網上吹水惹禍

以言入罪既事件其實都有好幾單﹐例如戲言話炸迪迪尼﹑中聯辦果D﹐留言者全部都要負上刑事責任﹐但係警方今次擺明護短﹐偏幫自己友﹐想件事不了了之。呢D選擇性執法真係好唔要得。

除左警察﹐小販管理隊都成為人見人憎既執法部隊。之前有一單話有個雪糕小販比食環署檢控無牌賣糖果﹐最後個法官都鬧食環署班友無聊﹐結果只係象徵式判最低罰款了事(好似話個法官之後仲專程去幫襯個雪糕小販鼓勵佢﹐成為一時佳話)。跟住呢幾日又有單係年老婆婆被小販管理隊拘捕﹐有位阿伯幫佢求情反而被控告襲擊罪。可能年老跑得慢容易捉D掛﹐要交差咪揀D好恰D架囉。而家香港執法者既pattern已經好明顯﹐權貴同埋有錢既就難搞﹐自己人呢就要袒護﹐所以咪專欺壓D小市民囉。

雖然話香港執法者欺善怕惡﹐但係照計都應該都衰唔過美國呢個所謂法治社會既警察既。美國警察既腐敗程度比起香港華探長年代果D真係有得揮。前排睇到有一單係老婦被警察誤認為毒販而開槍擊斃﹐之後班警察仲栽贓陷害死者黎掩飾過失﹐真係好恐怖。而且之前都唔少警察貪污﹑插贓嫁禍﹑亂開槍打死良民既事件﹐真係同黑社會無分別。

香港當年就有麥理浩成立廉政公署﹐整肅同監察執法部門﹐雖然而家香港警察都開始出軌﹐但係都未至於好似當年咁無法無天。但係美國又會點樣處理執法部門既腐敗呢﹖成立監察部門肯定就大把人反對(尤其是果D小政府主義者﹐即係果D右派呢)。長此下去﹐警民之間既關係只會每況愈下﹐釀成更多既紛爭。