豆腐火腩飯

係網上睇到呢篇野﹐笑死我。
............................................................................
我每食完一碟火腩飯之後都會同我女朋友講分手

因為我知道, 佢已經唔再明白我

佢唔知道我o係茶記所經歷過既有幾多

佢問我食乜, 我真係唔想答佢
日本野? 秦國野? 真係敷淺
究竟我仲可以繼續忍受自己既伴侶將d生既肉放入口
每舊火腩都經過紅紅烈火，百度高溫
係經過歷煉, 係經過漫長既試鍊
每一舊都有佢既歷史，佢既故事
魚生究竟有d乜? 根本就好似d白痴港女錦, 一無所知, 戇鳩鳩, 生勾勾

我恨我既人生唔可以好似火腩錦
搵到咁多好既伴侶, 豆腐, 涼瓜, 冬瓜, 枝竹..各有特色
亦搵唔到咁多知音人,

有時侯, 我自己一個坐o係茶記食火腩飯
我覺得自己係孤獨, 我覺得呢個世界係冇人明白我
我叫左枝青島, 我望住杯入面黃色既啤酒
我望唔透, 我望唔清究竟呢個世界仲有幾多野我係掌握到
我好迷茫

我離開間茶記, 我俾錢既時侯發覺有個OL食緊枝竹火腩飯
我望住佢, 佢望住我
我地互相點點頭
我好感動, 原來呢個世界仲有人係同我有相同既諗法
我忍住淚水
走出茶記, 點起支煙,
頭都冇回就走返屋企
或者個OL會問, 點解我放棄呢一段咁難得既姻緣

我唔知道
o係呢一刻
我覺得我係一個浪子
.........................................................

仲有呢篇﹐真係頂佢唔順
http://www.breakazine.com/rice.htm

評《潛行凶間》（Inception）

Inception上畫以黎已經連續兩星期票房冠軍﹐而且好評如潮﹐真正係叫好叫座。

戲中既科幻構思幾新奇有趣﹐幕後班底真係創意十足﹐而且都算得上合情合理﹐唔似好多科幻片充滿犯駁疑點。

唔想寫太多劇透﹐只可以話故事非常複雜﹐現實﹑夢境﹑回憶縱橫交錯﹐又夢裡有夢﹐幾層夢境﹐生死之間穿梭來回﹐少D專心都會大叫吃不消。

Christopher Nolan一向擅長搞奇幻驚險﹐又以別出心裁既敘事手法著稱﹐呢套戲就兩樣都玩得好盡。尤其是幾層夢境之間既互動﹐堪稱一絕﹐而電影對於夢境與夢境之間轉接既處理更營造出張力﹐剪接應記一功。

呢套戲純粹以創新概念同複雜情節取勝﹐至於演員方面﹐整體表現不俗但係已經難以搶鏡﹐比較搶眼既應該都係只係主角回憶同夢境出現既妻子Marion Cotillard 同埋主角建築系既師妹 Ellen Page。

係現時充斥住改編﹑翻炒﹑同埋金玉其外既3D/電腦特技既荷里活裡面﹐呢套電影發揮出既創意﹐可算係難能可貴。

發達窿CEO立法會被狂轟

立會痛批　八達通 CEO埋沒良心講大話

最近八達通被揭發出售客戶個人資料圖利﹐引起軒然大波﹐搞到人心惶惶﹐個個都話驚每日行蹤曝光﹐好似D未來科幻片咁。講到保障個人資料﹐不得不提美國一樣極其失敗既野﹐就係social security number。呢樣野對於每個美國人黎講﹐都係最重要既一個ID﹐銀行戶口﹑報稅﹑出糧都係靠佢﹐可以話身家性命都盡在此中。偏偏呢個number就竟然冇相為證﹐於是個number一比人知道左就分分鐘會被冒名申請無數咁多野﹐食左死貓都唔知乜事。八達通呢單洩漏私隱﹐都係構成滋擾﹐起碼唔會威脅到身家財產﹐但係係美國﹐個人資料被盜﹐真係隨時一身蟻。人地香港申請乜叉野都用身份證﹐有相架大佬﹐你拎住人地張身份證根本就無可能冒到人身份啦﹐所以根本就唔需要擔心呢樣野。

美國係身份盜用最嚴重既國家﹐social security number好明顯有問題啦。奇怪既係居然無人提出過話要改革﹐唔知係咪嫌成本太高呢。

千呼萬喚始出來-- Starcraft II - Wings of Liberty

當年係大學同人係computer lab連線玩﹐八個人排係度一人一部機﹐戴住headphone大戰﹐真係何其壯觀。

咁多年後終於出第二集﹐熱潮似乎並無減退﹐fans都應該等左好耐喇。

胡志偉牧師推介《論盡基督徒》 (UnChristian)

從《論盡基督徒》看為何基督徒不像樣？（上）
從《論盡基督徒》看為何基督徒不像樣？（下）
節錄﹕
《論盡基督徒》雖有濃烈的美國文化，然而兩位作者經研究後所作的立論，對香港及各地華人教會有不容忽視的提醒。我們倘若不自我批判，我們在文化戰場與公共空間，將會不斷被邊緣化，甚至被醜化。當我們能容得下別人的見解，即或是成見，並能作出合理的改進，基督教信仰方能有力地重新定義文化與塑造文化。本書內容適宜作為職青與大專生團契或小組的聚會內容，透過討論，並補充本地的相關研究，讓我們坦然面對教外人質疑，從而展示「效法基督」的生活方式。要改造形象，先由小眾開始做起！

（後語：教會領袖要有勇氣正視現象，並不斷作出自我批判；過度的防衛機能讓我們看不見、聽不入。當我們能承戴教內外人的質疑與提問，這就是我們的自信所在。缺乏安全感的教會領袖與信徒，不敢面對問題，把提出質疑的趕出堂會，固步自封，思考事物只是「非友即敵」）。

amazon link:
unChristian: What a New Generation Really Thinks about Christianity... and Why It Matters (David Kinnaman and Gabe Lyons)

作為主既門徒﹐以身作則做好既見證真係好重要﹐可惜而家有太多偽善既基督徒(例如一味作道德批判﹐自己卻其身不正﹐是非不分/甚至埋沒良心)﹐如果當中有名氣大影響力強既﹐對於基督教就為禍更甚﹐因為不但教會既平信徒會以這些領袖作為模範﹐而且非信徒對於基督教既印象更往往係從呢班領袖既形象而起。呢本書如果真係可以如胡志偉牧師所講﹐對於各地信徒甚至教會都能夠有「不容忽視」既提醒﹐咁就真係幾值得睇。

果D以自由市場信徒自居既財團打手應該要睇下

趙耀華﹕獨家專訪亞當斯密

重點﹕
「我所理解的資本主義，是由無數小生產者和地主紳士階級所構成的資本主義，那裏沒有大公司，沒有大財團，資本家更非當權者。在這個國度，市場只佔社會關係的一小部分，此時讓人們自己照顧好自己，那就是最合適不過的安排；我在《國富論》中用了self love 這個詞，而不是self interest 或者 selfishness就是這個意思。這種基於自利的市場與利他主義的倫理觀並無衝突。但是，一間銀行倒閉可以動搖整個國家經濟，一個CEO可以拿幾百萬美元的分手費，這樣的市場既非我所鼓吹的自由市場，事實上也不配稱為自由市場……」

D右派人盲目推崇自由市場﹐甚至扭曲自由市場既真義﹐淨係幫哂D大財團。果D真正可以從中得益既都話可以理解﹐但係有D中產人士企係右派果邊又唔會得到財團既利益既﹐呢D人我應該話佢地偉大定係戇居﹖

陳雲 - 保衛大粵語

http://portal.michaelc.org/inews/online/20100720-hkej/file92.htm

好多人都有一個錯覺﹐以為粵語粗鄙不文﹐普通話文雅D﹐高人一等。但係﹐其實粵語保留左更多正宗漢語既語法同詞義﹐至於普通話﹐就只係北方胡族語言同北京土話混合埋既三不像而已。中央位於北京﹐出於政治需要﹐用北京語做官話無可厚非﹐但係以此為正統再強逼各地取代其本地方言﹐就極其荒謬﹐尤其話要取締粵語呢種蘊含中華文化傳承精粹既語言﹐就更加無資格。廣東人民對中共要取締粵語反應激烈﹐中共要搞統戰﹐相信唔會太有效﹐我睇到都感到欣慰。

一樣蛾眉，何必相妒﹖(古德明)

D比喻真係好鬼抵死﹐講到成班政棍都係妓女搵恩客咁。

http://news.hotpot.hk/fruit/art_main.php?iss_id=20100717&sec_id=4104&art_id=14249682

香港政制改革，民主黨輕輕解下民主普選的羅衣，向中共薦進特權選舉的枕席，於是芙蓉帳暖，新承恩澤。劉淑儀等幾十位香港立法會議員，向來事共唯謹，一時冷落長門，滿腔幽怨，化為立法會上劉淑儀一聲嗟歎：「有事鍾無豔，無事夏迎春！」

我不知道劉淑儀之流，領取議員正常月俸之外，還期望什麼恩寵；更不知道她們「為市民服務」的口號之下，怎麼竟然透露後宮的醋意酸心。無論如何，立法會那些夏迎春不該吃民主黨的醋。民主黨並不是鍾無豔。

鍾無豔原名鍾離春，號無鹽女，戰國齊人，貌醜無雙，行年四十，還是無人迎娶，於是走到王宮司馬門外，懇求門人傳達，說想嫁齊宣王：「願備後宮之掃除。」她終於獲宣王召見，在殿上慷慨陳詞，指出朝廷「內聚姦臣，眾人不附（百姓離心離德）」，危機四伏。宣王如夢初醒，退諂諛，去奢侈，「四辟（開）公門，招進直言。拜無鹽君為后，而齊國大安」（《新序．雜事第二》、《列女傳》卷六）。後人多事，把這位無鹽女變成鍾無豔；又杜撰了一個夏迎春，做她的死對頭。

民主黨和鍾無豔唯一相似的地方，是自詣宮門託人引薦，其他言行無一雷同。

第一，「鍾離春正而有辭」，求見齊宣王，光明磊落。民主黨則不然，去年十二月承中共意旨否決港人公投之後，馬上求中共手下梁愛詩引線穿針，私通胡錦濤，却努力瞞瞞瞞，宣稱「二月十二日第一次接到梁愛詩電話，想商談要事」。不是梁愛詩發表聲明，呼籲「請勿本末倒置」，香港市民還以為是中共先敲民主黨大門。

第二，鍾離春勸齊宣王愛民。不附朝廷的民眾，在她眼中，絕對不是豬狗。民主黨則不然，毀却「堅持民主普選」的競選諾言之後，視不肯追隨附共的民眾為寇讎。黨元老司徒華怒叱自覺被出賣的選民：「出賣？你是豬還是狗，值多少錢，可以賣嗎？」年前中共黨員馬力說，六四事件中，被坦克輾成肉醬的是豬玀，立論和司徒華互相輝映。

第三，鍾離春對當道姦邪略無讚譽，教齊宣王一律罷黜。民主黨則不然，被梁愛詩揭發「瞞瞞瞞」之後，還一臉謙卑，盛稱梁愛詩「誠實廉潔」。也許，他們以為香港人都忘了梁愛詩任律政司長期間，怎樣屈法申恩，包庇富豪胡仙；怎樣指黑為白，為二十三條箝制輿論法辯護。

然則民主黨、劉淑儀以及民建聯、工聯會諸公，都是夏迎春。一樣蛾眉，不必相妒。中共富有一國，對她們絕對可以雨露均霑。

古德明
專欄作家

apple都識玩河蟹同五毛伎倆

Apple Censoring Discussions of Consumer Reports iPhone Review

負評一律被河蟹﹐真低裝

蘋果﹕天下天線一樣爛

玩埋抹黑﹐黎橫折曲﹐臭蟲論﹐堪稱五毛絕招

我一直都好欣賞apple產品﹐而家都係一樣﹐不過今次呢單野蘋果真係搞到一塌糊塗﹐有錯又唔肯大大方方認左佢﹐又唔肯提供解決辦法﹐公關能力真係屎到無朋友。都好既﹐Apple搞臭個招牌﹐我以後可能有平野執。

教授因講述反同性戀教義被炒

Ill. Uni Prof Fired After Teaching Catholic Anti-Gay Dogma

越黎越覺得呢D所謂政治正確既野簡直係痴X線﹐家下個教授教緊Introduction to Catholicism﹐係教天主教呢個信仰﹐根據天主教教義﹐同性戀確實係違反自然定律播﹐咁都唔講得﹖個教授又唔係教D學生支持呢個觀點﹐有咩理據炒佢先。

就咁炒左個教授﹐根本就係妨礙言論同學術自由﹐同土共有鬼分別。

CNN強力推薦 香港 40美食殺入國際

生果日報報道
CNN原文

香港素有美食天堂之稱﹐即使不少傳統美食如金錢雞﹑蛋黃千層糕等已日漸式微﹐但係爛船都有三斤釘﹐都仲有唔少好野食既。

CNN呢篇野既推介都算唔錯啦﹐雖然有個別既推薦都係有少少有名無實呃鬼佬之嫌(例如鏞記﹑蘭芳園呢D)﹐同埋好似有D偏好港島地方﹐不過大部份都算地道。

睇到呢篇野真係好懷念香港既美食﹐post出黎等自己可以望梅止渴一下。

袁崇煥「掉哪媽」名句遭鏟走 打壓廣東話升級

打壓廣東話升級 袁崇煥熱血名句　遭官方下令鏟走
「掉哪媽」成衝鋒口號

嚴格黎講﹐其實廣府話比起普通話更加係正宗既漢語﹐更近似唐宋時期既官話(讀唐詩宋詞就知﹐用廣東話係更加押韻)﹐相反﹐現代既普通話只係受北方胡族影響而形成既語言。當年民國初立﹐廣東話只差一票就成為中國官方語言﹐只係成王敗寇﹐如今中文已經係普通話既天下。呢樣都唔係問題﹐各地只要能夠保住保存方言既自由﹐學多一種官話都OK﹐中國自古以黎都係咁。但係而家中共擺明要打壓各地方言(上海話早已受害)﹐唯普通話獨尊﹐唔知係咪又一個統戰策略。

特狗答問大會拒絕回應質詢﹐原因﹕冇禮貌

特首答毓民：冇禮貌好難答

答問大會上面﹐立法會議員代表市民向特首提問﹐回答問題應該係特首既責任黎架﹐呢個係基本法都有列明啦。唔怪得香港無普選啦﹐原來基本法只係一個擺設。

係香港做官真係容易﹕一句無禮貌就可以推掉回答質詢既責任﹔又可以擺官威﹐老豆教仔咁款﹐話你無禮貌﹐唔答你﹔有時又可以好似林公公﹐串77咁﹐幾神氣呀。搞到我都想返去考個AO做下﹐睇下可唔可以升上去做個狗官。

西班牙慶功大會﹐阿仙奴隊長法比加斯被笠上巴塞球衣

世界盃開鑼之前其實就已經傳出阿仙奴隊長法比加斯回巢巴塞既傳聞﹐西班牙奪盃慶功會上﹐公認為國家隊笑星既利物浦門將連拿就攬住法比加斯﹐再由巴塞後防孖寶佩老大同碧基為佢笠上巴塞球衣﹐法比之後除都除唔切﹐真係搞鬼。

之前法比向巴塞大送秋波就唔出奇姐﹐但係巴塞最近有財困消息傳出﹐連糧都無得出﹐法比仲唔縮沙咩。

世界盃決賽雙雄羞恥﹔德國烏拉圭雖敗猶榮

今屆世盃決賽水平可謂有史以黎最低(比98年假波更可恥)。我身為荷蘭死忠同埋半個西班牙fans都忍唔住要插呢兩隊波﹕一隊就表演少林足球﹐另一隊就係陰濕影帝﹐以媲美奧斯卡水準既精湛演技加上陰濕既抽水掩眼法動作欺騙球證。而球證唔能夠明察秋毫﹐偏幫西班牙﹐更加降低球賽質素。首席球證係英國人﹐而荷蘭球員都識英文﹐遇到唔合理既判決就梗係利用語言優勢同球證據理力爭啦﹐偏偏呢個首席球證就一見到你要辯駁就比牌﹐搞到比牌次數破盡歷史紀錄﹐令比賽蒙上陰影。而最後西班牙既入球更係大有問題﹐恩尼斯達越位在先(唔係計佢射波果陣﹐而係廢托傳第一球波果時越左)﹐旁證就當睇唔到。平心而論﹐論表現﹐荷蘭確實唔抵贏﹐控制唔到中場﹐史奈達全場隱形﹐而洛賓兩次單刀機會把握唔到更加係抵打﹐但係輸係個問題球果度就真係欠缺說服力﹔如果係互射十二碼而輸就真係心服口服喇。

荷蘭靈魂史奈達由月前國米贏取歐聯既意氣風發到現今世界盃既慘敗﹐可謂由高峰直墮谷底﹐難怪賽後一直眼有淚光﹐睇到令人心酸。而西班牙隊長卡斯拿斯(皇馬)﹑獅子王佩奧爾﹑中場指揮官沙維同「小白」恩尼斯達(巴塞)可謂贏盡所有錦標(西甲﹑歐聯﹑歐國盃﹑世界盃)﹐尤其是卡斯拿斯長年被巴塞壓倒﹐如今以隊長身份帶領成班巴塞人奪標﹐可謂吐氣揚眉﹐難怪贏波之後流下男兒淚。

西班牙聯賽質素高﹐青訓水準標青﹐自然代代人才輩出﹐相反荷蘭青訓已係江河日下﹐下屆仲有無機會爭真係好難講﹐所以今次荷蘭既失敗比西班牙更值得惋惜。而西班牙經過08歐國盃同今年世界盃洗禮﹐脫掉「大賽腳軟」既標籤﹐除去心理負擔﹐可以話已經正式躋身世界列強﹐以後都應該可以與巴西意大利德國阿根廷等同列喇。

同決賽相反﹐季軍戰真係讓球迷們睇到一場好波。全場埋門攻勢多﹐德國烏拉圭兩隊都踢得進取﹐亦有君子之風。科蘭又入左球靚波﹐臨尾佢既罰球中楣更係驚心動魄﹐娛樂性好豐富。兩國雖然係戰敗者﹐但表現出體育精神﹐雖敗猶榮。

今屆球員最搶眼可算係烏拉圭既靈魂﹑進攻既發電機--前鋒科蘭。整隊波無邊個係好勁同有名氣﹐但係科蘭就一個人帶起左成隊波。雖然烏拉圭八強戰對加納係有D運氣(當然唔少得蘇亞雷斯臨尾當機立斷果球手球)﹐但係能夠係被一致睇淡既情況之下帶領球隊殺入四強﹐真係好犀利。今日宣佈科蘭贏得世界盃金球獎﹐衷心覺得佢實至名歸。當年佢加盟曼聯﹐未能適應英超節奏﹐受盡冷眼﹐後來轉戰西甲係馬體會重獲新生﹐連奪西甲神射手﹐如今世界盃帶領國家隊取得令人意想不到既第四名﹐又贏得金球獎既榮譽﹐更有望問鼎世界足球先生寶座﹐可謂踏上生涯高峰﹐真係此生無憾。

另一個令人眼前一亮既當然係德國小將湯馬士梅拿。呢位小將年僅20﹐上季先開始係拜仁慕尼黑冒起﹐人人都話佢欠缺埋門把握力﹐點知係世界盃就入5球比你睇﹐而且表現出色﹐對於德國既反擊戰術可謂舉足輕重(對西班牙果場無左佢既影響好明顯)﹐真係典型大賽球員﹐有前途。贏得今屆最佳年輕球員亦係實至名歸。

回首十三年 - 古德明

http://news.hotpot.hk/fruit/art_main.php?iss_id=20100710&sec_id=4104&art_id=14224346

七月一日，香港上午有遊行「慶祝回歸祖國十三年」，下午則有遊行抗議民權遭踐踏。慶祝隊伍裏，有人喜色欣欣說：「香港人擺脫了英國統治，當家作主，自然值得高興。」抗議行列中，則有人默默無聲，手裏拿着小小一面英治時代香港旗，似有萬千惋惜。
香港易手十三年，應該惋惜還是高興，最好是看事實。
論民生，一九九七年，年輕一代初入社會工作，月薪平均八千二百元；二○○八年，則降至七千五百元。一九九七年，最貧困家庭每月平均收入四千一百元；二○○九年，則降至二千五百元。其間米價、房價等，或相倍蓰；貧富之懸殊，得未曾有。
論教育，英治時代，官立、津貼學校一律有教無類，不分貧富；今天，經當局大力倡導，傳統名校紛紛轉為「直資」，學生少一個錢，都只能望門興歎。學校從此分了貧富階級。
論自由，一九九七年之前，歷史課本談到鴉片戰爭，可以臚列英國鴉片輸華的毒害；今天，所有課本談到六四事件，則都諱莫如深。一九九七年之前，市民遊行抗議，不會隨時蒙上「襲警」罪名；殖民政府也從來沒有一條「國家安全」議案，激起至少五十萬市民上街反對。
論政治，從前，香港總督由英國民選政府委任；現在，香港行政長官則由八百個特權人物選出，其中多的是財閥。上月，《東亞研究學報》發表香港中文大學政治系助理教授黃鶴的研究報告，說比較一九九七年前後財閥公司利潤，「九七年後官商勾結」論，信而有徵。
現在再說兩件小事。一九九一年，菲律賓法院以「販毒」罪名，判處香港市民區永祥終身監禁；港督彭定康認為案件可疑，出手相助，區永祥終於恢復自由。二○○○年，菲律賓司法機關又以「販毒」罪名，拘捕香港市民張泰安。案件同樣可疑，至今十年，竟然還未有定讞，香港行政長官曾蔭權却視若無睹。
中共指揮的「香港人當家作主」，不可能不是這樣。
五代十國期間，後唐明宗皇帝本是代北胡兒。他不通聲色，不樂遊畋，愛人恤物，聽到民間穀帛便宜，無有疾苦，就欣然和大臣共勉：「吾何以堪之，當與公等作好事，以報上天。」曾經晚上焚香，向天禱告：「臣本蕃人，豈足治天下？世亂久矣，願天早生聖人。」在那兵戈擾攘的時代，後唐百姓得以休息，得以溫飽。所以，史家稱讚他「能力行於王化，政皆中道，時亦小康，近代以來，亦可宗也」（新、舊《五代史．明宗紀》）。我國古人不是沒有民族情懷，但更重視百姓福祉。為「香港回歸祖國」高興的人，不會理解其中道理。
文：古德明
專欄作家

Inception 潛行凶間

Christopher Nolan作品﹐應該無甩拖喇﹐必睇。

Trailer:

LeBron + Wade + Bosh 成為Miami Heat 三巨頭

Boston 早幾年整左個老將三巨頭﹐即刻贏左個冠軍。而家Miami 就簽左三大巨星(歸隊既Wade﹐加上LeBron 同 Chris Bosh)組成超級三巨頭﹐圖謀打造熱火王朝。

其實10幾年前Miami 都嘗試過簽三個球星打造冠軍組合(Mourning﹑Tim Hardaway同Juwan Howard)﹐不過最後關頭NBA話Miami違反salary cap條例﹐廢除Juwan Howard同Miami簽既合約﹐所以唔成事。今次Pat Riley再接再厲﹐終於成功﹐不過效果會係點就好難講喇。

三巨頭本身friend底﹐係奧運又合作愉快﹐來季配合應該不成問題。不過最困難既係﹐三大巨星既薪酬已經接近爆cap﹐跟住仲可以簽咩人呢﹖單靠老將最低工資合同可以吸引到幾多有質素既「戒指獵人」(ring hunter)加盟呢﹖真係要拭目以待。

facebook係顛覆中共政權平台

社 科 院 ： 社 交 網 恐 成 外 國 顛 覆 政 權 平 台

網絡真係好危險架﹐社科院既前輩們你地都係快D返火星啦。

不過我都曾經睇過一篇評論﹐話將來中國政局既演變(講得隱晦少少)會係由網絡開始﹐因為大陸網絡普及化﹐網民既知識水平又比較高﹐奴性相對較低﹐所以推動呢種演變都會係呢D網絡群體而起。社科院既恐懼都唔係無道理既﹐不過自古以黎﹐政治腐敗﹐人民揭竿而起都係歷史常規﹐如果能夠整頓吏治﹐百姓能安居樂業﹐又點會有呢d問題。

德國不敵八爪魚﹐全場被西班牙牽制﹐輸1-0

八爪魚阿Paul日前預測西班牙會打敗德國﹐此前Paul既五次預測全中﹐所以球迷們都放長雙眼睇下八爪魚預言威力能否打垮氣勢如虹既德國。

德國既穩守突擊今場可以話完全無用武之地﹐一方面固然係因為湯馬士梅拿停賽令反擊速度大減﹐以致未能有效鑿穿西班牙唔算穩陣既防守﹐但係最主要原因都係西班牙一有波就控球在腳﹐慢慢同你搓﹐甚少甩波﹐令德國好多時根本就無從反擊﹐攻勢可謂寥寥可數﹔反而西班牙趁住德國縮後博反擊既戰術就不斷以短傳滲透﹐有不少到肉攻勢﹐只係德國防守穩陣﹐加上門將紐亞表現對辦﹐先可以keep住0-0士哥到半場。正所謂久守必失﹐德國又未能打出有效反擊﹐而且寥寥幾個有威脅既攻勢又比「聖卡斯拿斯」頂住﹐德國可以頂到70零分鐘先輸球佩老大既靚頭鎚﹐都算係咁喇。

德國死係八爪魚爪下﹐唔知以後德國人民會唔會將八爪魚當作日常食材黎泄憤呢﹖

當然﹐預言或者魔咒呢D都係純屬戲言而已。德國一直贏得漂亮﹐頓成大熱﹐跟住就馬失前蹄小輸出局﹐呢種現象其實以往世界盃都屢見不鮮。54年匈牙利場場炒人三四蛋﹐去到final咪又係比西德悶死。而每一屆既冠軍幾乎都係果D場場都係僅僅小勝﹐感覺-6既球隊(98法國同上屆意大利尤其明顯)。所以德國今次又大熱出局﹐都唔係完全無預兆既﹐雖然佢地氣勢如虹都嚇到我有D震。

而家兩隊愛隊都入final﹐有機會爭首個冠軍﹐邊隊贏都高興(當然荷蘭贏會更開心)。

New Hope 晚餐

呢排講親既多數都係政治﹐少左D風花雪月﹐係時候整返篇食評。

今日睇完德國vs 阿根廷﹐就上去New Hope﹐夜晚去左Marsha Brown食dinner﹐呢間野幾得意﹐原本係間church黎﹐而家比人買起左黎做餐廳﹐都幾特別。

之前已經book左位﹐仲預早時間入去攞位﹐入到去個老細就比張靚檯我地﹐係三樓。

三樓果個窗口﹐好classic既教堂feel

上面望落去二樓就係咁﹐真係成個教堂look黎架。

坐低就首先比左條法包比我地﹐有牛油同埋hummus比我地搽﹐條包有個藍色麵包袋包住﹐個麵包袋仲有餐廳個logo﹐幾過癮。

Appertizer叫左個lollipop lamb chop﹐無問我地要幾熟﹐結果係全熟﹐但係都好食﹐grill得好香但係唔會乾﹐有肉汁而且唔羶﹐配埋個mango chutney既汁好夾。

跟住要左個beet salad﹐beet係底﹐面頭係菠菜﹐仲有D bleu cheese粒粒。service果位都好細心﹐幫我地分左做兩份﹐值得一讚。

主菜要左個crab cake﹐同埋煎帶子加龍蝦尾配crawfish risotto。蟹餅好足料﹐成舊都係蟹肉﹐又有少少herbs既香味﹐而且外層煎得好脆﹐口感好好。另外果碟仲正﹐帶子爽滑﹐煎既火候剛剛好﹐龍蝦肉質鮮美﹐size雖然唔大但係都係好野﹐至於個飯都唔錯啦。


最後一定唔會miss甜品﹐waitress推介custard﹐就叫一個share﹐賣相幾好﹐用個杯黎上﹐杯上面有層meringue﹐好軟滑同好香蛋白味﹐底下既custard都唔錯﹐唔太甜﹐即使都已經八成飽都食得落﹐唔會好heavy﹐算係呢餐既一個完美終結。

比利魔咒發動﹐巴西反輸荷蘭1﹕2

今朝難得唔洗返lab﹐係office開gamecast睇士哥同埋現場commentary﹐睇住巴西一開場無耐就入波﹐諗住荷蘭應該都無望喇﹐好無癮﹐點知下半場Felipe Melo 無啦啦擺老烏﹐之後荷蘭開角球仲比火焰仔史奈達(Wesley Sneijder)接應剁雞(Dirk Kuyt)頭鎚二傳頂入埋﹐差D想歡呼出黎﹐開心到呢。

比利一直都tip巴西係今屆奪冠熱門﹐有人話可能就係因為呢個「祝福」﹐令到巴西奇跡反輸。不過呢場波其實係反映到巴西即使防守穩健﹐但係一旦落後﹐就無法應對﹐即係話唔識踢所謂既逆境波喇﹐呢場荷蘭贏得-6﹐不過巴西亦係抵輸。

而家四強荷蘭同烏龜鬥-6﹐唔知邊個夠運D殺到上決賽喇。

7.1遊行﹐市民參與不如往年踴躍

一心想要普選既市民好多應該都係心灰意冷﹐覺得搞幾多野都好﹐結果都係比民主黨出賣左﹐所以都費事o徙氣出黎遊行對住班反骨仔眼冤。但係如果比著係我﹐我都會照出黎﹐始終呢個都係表達訴求既機會﹐無理由放棄架。

民主黨班友又真係幾厚顏無恥﹐自己加盟左建制派都仲有面可以當無事發生過﹐以泛民身份出黎遊行。係我心目中﹐呢班友已經可以同民建聯並列為禮義廉聯盟。

華叔都係老喇﹐可能病得嚴重所以已經唔係太清醒﹐講既野真係越黎越離譜(睇睇下面個video)。佢應該專心休養﹐唔好再搞臭自己民主派元老既聲名喇。



有D阿叔阿嬸圍住支聯會攤檔狂鬧華叔﹐阿陶同佢老婆幫手勸群眾離開