今期流行既歇後語

四叔抱孫 -- 有爺生無乸教

李家傑搵代母借肚生三胞胎呢單野最近上哂各大報章頭條﹐滿足哂港人八卦心理﹐亦都令呢件事成為呢排香港城中熱門話題。

有錢真係大哂﹐花一千幾百萬就可以買肚生仔﹐但係BB一出世就無老母﹐真係可以話有爺生無乸教﹐都唔知將來會變成點既纨袴子弟喇﹐不過大公子都唔慌會操心架喇﹐果3個B睇怕都係大公子用黎奪嫡既工具黎﹐佢地變成點又有乜所謂。

而家徐子淇就真係大劑﹐如果繼續都係生女﹐家誠哥呢位外父相又唔肯認命既話﹐睇怕遲早都會包返個二奶﹑三奶﹐甚至休妻都有之。

香港點可能搞得起創意工業

港府拒助影片《宅男》參賽

瑞士當局出埋邀請﹐夠認受性喇掛﹐都唔肯資助﹐果幾萬銀濕濕碎啦。起高鐵就幾百億倒落去﹐搞亞運呢D好大喜功既野又百幾億倒落去﹐呢D有助香港創意產業發展既錢就唔肯比﹐政府又一次展現出佢既無能同短視。

香港創意工業不斷萎縮﹐新一代有志於係呢行發展既又唔獲得支持﹐呢門產業好快玩完(其實應該話已經玩完)。

不過鬧完都要讚下今次網民力量﹐偶然係某論壇睇到當事人開post講呢單野﹐有網友話推到上報比人知政府幾咁仆街﹐結果真係上到報﹐好野(當然﹐生果記者時常出沒各大論壇都已經係人所共知架喇)。

開香檳慶祝劉曉波得獎﹐竟被控襲擊罪

香港又一次揚名海外﹐連CNN都有報道。
celebrating nobel, woman arrested for splashing champagne

噴香檳都構成襲擊罪﹐如果我上網留言話係時代廣場開香檳唔知會唔會有警察入屋拘捕我呢﹖甚至可能我講「迪迪尼」開香檳係咪都會比人拉﹖

真係懷疑D警察係咪曲線抹黑土共﹐借呢D低B行為黎幫偉大祖國倒米。不過都係唔洗睇得呢班友咁高架喇﹐一牽涉到政治野呢班友就即刻東廠上身﹐變哂公公﹐搖身一變成為土共奴才兼特務。但係擦鞋都擦得要有技巧架﹐而家搞出個大頭佛﹐惹人恥笑﹐阿爺點會領你情丫。

劉曉波獲諾貝爾和平獎

中共外交部發表聲明話咁樣係褻瀆左呢個獎項﹐仲話會影響中國與挪威兩國之間既關係。

佢地都懵既。人地挪威洗驚你﹐你咪唔好出口稀土比佢地囉﹐但係人地有大把天然資源﹐都唔稀罕你D稀土啦。

仲有﹐諾貝爾獎雖然係挪威果度頒﹐但係評審又唔係隸屬政府既﹐根本就係獨立機構﹐你向挪威政府施壓有屁用咩。

中共D外交真係廢到無倫﹐一次又一次出醜﹐不如唔好叫外交部喇﹐叫on9部吧啦。

最後﹐要向劉曉波致一致敬﹐呢個獎係佢應得既。佢一直以黎為中國人民所付出既一切係唔會白費。

變性人可否結婚﹖

最近香港有男變女既變性人與男友申請結婚被拒﹐於是就上訴高院。早前高院司法複核﹐裁定呢位變性人敗訴。

作為一個基督徒﹐當然覺得變性係唔應該﹐不過呢單野諗落其實真係好吊詭。香港容許人做變性手術﹐仲會update埋身份證性別添﹐似乎係承認左法律上已變性既身份﹐但係偏偏係婚姻既層面上就唔當係變左性﹐真係好矛盾﹐兼夾搵笨﹐搞到好似係要跣呢班變性人一鑊咁。

法官判決係根據變性人出生時既性別黎定﹐呢個理據其實都好有問題。假如原本有一男一女﹐其中一方做變性手術﹐根據法官既判決﹐兩人應該有結婚既權利﹐因為兩人天生係異性﹐但係變性手術之後係同性播﹐咁樣會唔會變相將同性婚姻合法化﹖又如果呢對男女各自做左變性手術﹐咁係咪應該可以結婚﹖

其實只要釜底抽薪﹐立法禁止變性手術﹐問題就可以迎刃而解﹐只係香港偏偏要扮開明﹐又唔開放得哂﹐搞到兩頭唔到岸﹐鬧出呢單笑話。

頭條新聞又黎喇

係正國慶日開鑼﹐真係應景~

劉皇發=流王法﹖曾凸手事後改法包庇土皇帝

身為特首竟然目無法紀﹐單野穿左先至改法例﹐擺明係包庇條鄉下佬