商台淪為土共喉舌

最近民建聯出幾十萬比商台買起深夜時段做節目幫黨員宣傳﹐可能而家無人聽啦﹐所以都要搵下其他財路掛。潘小濤就係自己既節目裡面抨擊商台幫民建聯賣政治廣告﹐話咁做等於引入魔鬼﹐讓中共得以藉著其傀儡政黨鉗制言論自由﹐仲話商台對唔住當年67暴動捍衛言論自由而壯烈犧牲既林彬。

黃永同民建聯節目既主持泰山既回應先夠無恥。黃永話民建聯唔係以政黨名義註冊﹐所以唔知係咪政黨﹐簡直係擘大眼講大話。泰山既回應更加令人拍案叫絕﹐話林彬單野係意外﹐原來比人淋汽油活活燒死都可以係意外﹐咁世上睇怕都無殺人案喇。

雖然都係搵食﹐但係為左飯碗而屈服於權勢之下﹐埋沒良心﹐真係唔配做傳媒﹐做得呢行就應該有呢行既職業道德﹐學謝志峰話齋﹕甘於貧﹐支筆先會硬。為左幾十萬將時段賣比中共奴才﹐遲D係咪可以收幾千萬將時段賣比中共做洗腦宣傳﹖商台已經淪亡了。

不過香港近年都興是非不分﹐指鹿為馬﹐搞暴動既殺人兇手都有金紫荊勳章啦﹐再咁落去﹐香港赤化既日子不遠矣。



有市民話要請俞琤食蛇羹。商台咁鍾意痴埋民建聯﹐應該都好受落既。