上週末大事回顧

呢幾日返到屋企﹐煮完食完晚餐﹐之後都無太多心機作文﹐淨係想係度hea﹐download下日劇﹑新舊歌仔咁。不過都想講下上個weekend既﹐始終都係難得一見既盛事﹐所以今晚趁有心情就簡略寫下啦。

咩盛事咁把炮﹐之唔係拿姐同莊少既婚禮囉。呢對金童玉女身為主角﹐靚爆鏡就梗架啦﹐不過除左主角之外﹐當日都真係衣香鬢影﹐有靚靚伴娘﹐型男MC﹐又有超級美女歌后同俊俏小生獻詩﹐而最勁既都算係難得穿著牧師袍﹐超有台型既漁牧﹐型爆。至於我呢﹐第一次參與婚禮既工作﹐都覺得幾興奮﹐不過點燭果陣就真係好怯﹐戰戰兢兢地緊握住支野﹐一路行一路震﹐又要同奇雲互相配合步伐﹐好緊張﹐最恐怖係支野仲好似想熄咁﹐Thank God都可以順利點到﹐完成任務。當晚飲宴﹐最興奮莫過於重遇久違既炸蟹鉗(賣飛佛﹗)﹐至於玩對新人﹐可能唔係太夠喉...但係氣氛真係唔錯。最後幫手clean up完﹐大夥兒終於鬆一口氣﹐我心裡面都連聲thank God﹐都算叫做有contribution~

週日就同美女去睇Shrek the Third﹐原班人馬加上新角色﹐繼續將經典童話故事大玩特玩﹐加以諷刺。呢個formula都算幾成功﹐玩足3集都掂。但係呢集既主題就似乎無上兩集咁鮮明﹐而且故事既pattern有少少熟口熟面既感覺。應該好難會有第4集﹐因為都開始睇得出有D技窮喇。當然如果真係夾硬要拍既都可以既。